Gimandoan sa Office of the Ombudsman ang mga awtoridad sa Benguet nga kumpiskahon ug tipigan ang cellphone ug uban pang gadgets sa kanhi Department of Public Works and Highways (DPWH) Undersecretary nga si Catalina “Cathy” Cabral human siya makit-an nga wala nay kinabuhi daplin sa Bued River sa Benguet.
Sumala kang Assistant Ombudsman Mico Clavano, ang mga gadget ipasa sa mga imbestigador sa hustong panahon alang sa dugang pagsusi. Giingon sa kapulisan nga ang insidente usa ka “giingong pagkahulog,” ug nakit-an si Cabral mga 20–30 metros ubos sa Kennon Road.
Base sa imbestigasyon, nagbiyahe si Cabral ug ang iyang drayber paingon sa La Union mga alas 3 sa hapon dihang gihangyo niya nga ipabilin siya sa Maramal, Camp 5, Camp 4. Sa pagbalik sa drayber mga alas 5 sa hapon, wala na siya makita, busa nangayo og tabang sa kapulisan mga alas 7 sa gabii. Human sa pagresponde, nakit-an si Cabral nga walay panimuot ug gidala dayon sa ospital.
Miresign si Cabral niadtong Septiyembre taliwala sa mga imbestigasyon sa Kongreso bahin sa giingong anomalya sa flood control projects ug mga alegasyon sa kickback. Niadtong Disyembre 11, giingon sa Independent Commission for Infrastructure nga imbitahon siya isip resource person sa imbestigasyon sa giingong ghost ug substandard nga mga proyekto. Giapil usab ang iyang ngalan sa affidavit nga gibasa sa kanhi DPWH Undersecretary Roberto Bernardo atubangan sa Senate Blue Ribbon Committee, may kalabotan sa giingong koleksiyon sa kickback.
Photo Courtesy to: Philstar.com
