Hugot nga gimandoan ni Presidente Ferdinand Marcos Jr. ang Philippine Coast Guard (PCG) nga sigurohon ang kaluwasan sa mga Pilipinong mangingisda, human sa insidente sa pagpamomba sa China gamit ang water cannon batok sa mga Pilipinong mangingisda sa Sabrina Shoal o Escoda Shoal, nga kabahin sa exclusive economic zone (EEZ) sa Pilipinas.
Sumala ni Palace Press Officer Undersecretary Atty. Claire Castro, gimandoan sa Presidente ang PCG ug uban pang may kalabutan nga mga ahensya nga palig-onon ang presensya sa gobyerno sa West Philippine Sea. Apil niini ang pagpadala og mga pwersa sa mga estratehikong lokasyon aron mapanalipdan ang mga mangingisda ug masiguro ang ilang kaluwasan samtang nangisda sa teritoryal nga katubigan sa nasud.
Gipasiugda sa Malacañang nga ang mga Pilipinong mangingisda adunay katungod sa pagpangisda sulod sa EEZ sa Pilipinas ug dili angay nga ipailalom sa pagpanghadlok o kapintasan sa ubang mga nasud.
Mahinumduman nga tulo ka Pilipinong mangingisda ang nasamdan human gibombahan sa water cannon sa China ang ilang barkong pangisda samtang naa sila sa nahisgutang lugar. Diha-diha dayon nga nagpahayag og kabalaka ang gobyerno sa insidente ug mipasalig nga magpadayon kini sa pakigbisog alang sa soberanya ug mga katungod sa nasud subay sa internasyonal nga balaod.
Padayon nga nanawagan ang gobyerno alang sa kalinaw ug pagtahod sa mga katungod sa matag nasud sa West Philippine Sea, samtang nagsaad nga dili pasagdan ang kaayohan sa mga mangingisda nga Pilipino.
via: PRESIDENTIAL COMMUNICATION OFFICE
