Opisyal nga gilusad kagahapon Disyembre 15, 2025 ang SARAI Northern Mindanao Project sa Loiza’s Pavilion Grand Hall, Barangay Casisang, Malaybalay City, Bukidnon. Ang kalihokan nagdala sa temang “Opening Opportunities through Smarter Agriculture”, nga nagtumong sa pagpalig-on sa modernong pamaagi sa panguma pinaagi sa teknolohiya ug siyensya.
Gitambongan ang launching sa nagkadaiyang ahensya sa gobyerno, lokal nga opisyal, akademya, ug partner institutions nga naghiusa sa tumong sa pagpauswag sa sektor sa agrikultura sa Northern Mindanao.
Si Ms. Ritchie Mae L. Guno, Provincial Director sa DOST Bukidnon ug focal person sa SARAI Northern Mindanao, mipadayag sa pasalamat sa hingpit nga katumanan sa proyekto kauban ang laing pang LGU sa Manolo Fortich, Maramag, Kalilangan, nga mipirma sa Memorandum of Agreement
Usa sab sa highlight sa kalihokan mao ang pag-turnover sa Automatic Weather Station (AWS) diin gipasabot sab ni Dr. Moises A. Dorado, Project Leader sa SARAI CenTRO Project 2 ug professor sa UPLB–CEAT, nga makatabang kini sa mga mag-uuma sa mas tukmang pagplano sa tanom base sa tukma ug updated nga datos sa kahimtang sa panahon.
Gilauman nga pinaagi sa SARAI Northern Mindanao Project, mas mapalapad ang access sa mga mag-uuma sa siyentipikong impormasyon, climate advisory, ug modernong teknolohiya nga makatabang sa pagpausbaw sa produksyon ug kita sa agrikultura.
