Gi-kwestyon ni Noel Raterta, Vice President for Operations sa Cooperatibang Aglayan Farmers Beneficiary Association, ang ginahimong pag-install sa mga benepesyaryo sa Comprehensive Agrarian Reform Program (CARP) sa 119 ka ektaryang yuta sa Purok 4B, Aglayan, Malaybalay City.
Sumala ni Raterta, daw nawala ang katungod sa maong yuta sa ilang grupo tungod kay imbis sila ang i-prioritize, laing grupo ang nakadawat sa yuta. Gipanawagan niya usab ang mga opisyales sa Barangay nga moapil sa pagtan-aw sa maong isyu, tungod kay ang barangay mismo usa sa mga nakahibalo sa mga panghitabo sa maong yuta.
Apan, giingon ni Kapitan Toto Sajulga nga ang mando sa Department of Agrarian Reform (DAR) alang sa pag-instalar sa mga benepesyaryo nagikan sa korte, busa kini usa ka desisyon nga dili na pwede supakon. Gidugang pa niya nga wala’y mahimo ang barangay kon maghisgot kini og programa nga gi-implement sa gobyerno, bisan pa man ang uban nga benepesyaryo dili lumulupyo sa Barangay Aglayan.
Bisan pa man, gisiguro sa kapitan nga andam ang barangay, syudad, ug provincial government sa pagtabang sa pagplastar sa mga grupo aron malikayan ang kagubot ug masiguro ang malinawon nga implementasyon sa programa.
