Gipasalig sa Palasyo nga sa umaabot na mga adlaw, gipaabot nga masikop ang mga prominenteng personalidad nga nalambigit sa dakong pagpangawkaw sa pundo sa publiko nga alang unta sa mga flood control projects.
Nunot kini sa naunang saad ni Presidente Ferdinand Marcos Jr. nga sa dili pa ang Pasko, mapriso na ang mga personalidad nga nalambigit sa dakong flood control scam, lakip na ang mga big fish.
Matod ni Presidential Communications Office (PCO) Secretary Dave Gomez, gipaabot nga mopasaka og dugang kaso ang Ombudsman sa Sandiganbayan.
Kini nunot sa mga nangaging kaso nga gisang-at niadtong Nobyembre 18 batok kang kanhi Ako Bicol Party-list Rep. Zaldy Co ug kinse (15) pa.
Ang maong mga kaso, may kalambigitan sa substandard nga flood control projects nga gihimo sa Oriental Mindoro.
Gitataw ni Gomez, nga siyam ka mga akusado ang nasikop ug gidala sa Sandiganbayan aron atubangon ang ilang mga kaso.
Sa laing bahin, si Zaldy Co ug laing unom ka mga akusado pabiling gawasnon o wala pa madakpi ug padayon pang gipangita sa mga otoridad.
Hinuon gipasalig ni Gomez nga dugang mga kaso ang ipasaka sa umaabot nga mga adlaw batok sa ubang mga indibidwal nga nalambigit sa anomaliya.
Photo Courtesy to:klook
