Nagpagawas og pahimangno ang state weather bureau ngadto sa mga residente sa Visayas tungod sa kusog nga pag-ulan nga dala sa Bagyong Wilma.
Base sa forecast sa ahensiya, makasinati ang tibuok Visayas og dakong pag-ulan gikan kagahapong adlawa hangtod sa Domingo.
Gipaabot nga una nang makasinati og hangtod 100mm nga ulan ang mga probinsiya sa Eastern Visayas kagahapong adlawa hangtod karon nga adlaw.
Mosunod nga molapad o mokusog ang ulan sa Central Visayas, Negros Island Region, ug Western Visayas pagsugod sa Sabado hangtod Domingo.
Sumala ni Dr. Marcelino Villafuerte II, Deputy Administrator sa state weather bureau, posibleng molungtad og pipila ka oras ang serye sa pag-ulan nga mahimong hinungdan sa halapad nga pagbaha.
Gidugang pa niya nga gawas sa Bagyong Wilma, moapekto usab sa Visayas ang shearline nga kasamtangang nagpadayon sa silangan nga bahin sa nasod.
Tungod niini, gipasidaan sa opisyal ang mga residente sa Visayas, ilabina kadtong mga lugar nga nakasinati na og dagkong pagbaha panahon sa miaging bagyong Tino ug Uwan.
Photo courtesy to: Philippine News Agency
