Nakigkoordinar ang usa ka dagkong telecommunication company sa nasud ug usa sa pinakadagkong bangko aron ipaila ang Proof of Concept (POC) para sa Silent Network Authentication (SNA).
Gipahibalo sa Globe Telecom ug Bank of the Philippine Islands (BPI) nga ang maong bag-ong pamaagi sa beripikasyon nagtinguha sa pagpakunhod sa mga scam nga may kalabutan sa One-Time Passwords (OTPs) ug paglig-on sa proteksiyon sa mga kustomer samtang mapauswag ang kasinatian sa tiggamit.
Ang inisyatibo kabahin sa G Verify, ang portfolio sa Globe alang sa network-powered verification ug anti-fraud solutions nga nagamit og real-time network intelligence ug secure Application Programming Interfaces (APIs). Ang SNA usa ka groundbreaking innovation nga makapamatood sa identidad sa tiggamit dayon bisan walay paggamit og code o SMS verification.
Giingon sa Globe ug BPI, nga pareho sakop sa Ayala Group, nga kasamtangan nilang ginatestingan ang real-time, network-level identity verification aron mapamatood ang tinood nga identidad sa tiggamit, malikayan ang manwal nga proseso, mapaubos ang posibilidad sa pagpangilad, ug masiguro ang luwas ug sayon nga transaksyon. Nagpakita kini sa tinguha sa duha ka kompanya sa pagsuporta sa mas luwas ug seamless digital experience alang sa mga Pilipino.
Nagmalampuson ang Globe ug BPI sa teknikal nga balidasyon sa SNA, diin ang test application sa BPI direkta nang naka-interface sa Network Exposure Platform (NEP) sa Globe. Ang integrasyon nagtugot sa real-time authentication sa user, aron masiguro nga ang magamit sa device mao ang tinuod nga tag-iya sa account bisan walay text message o dugang lakang.
Ang POC nagpamatuod sa teknikal nga gahom sa SNA ug pagtuman niini sa GSMA ug CAMARA standards, nga nagpalig-on sa katuyoan sa Globe sa pagpangandam ug pagpalapad sa digital trust sa nasud. Kabahin kini sa Globe’s Open Gateway program, nga naggamit og APIs aron mahatagan og access ang network capabilities ngadto sa mga enterprise partners.
Sa laeng bahin, gipasabot sa BPI nga ang POC nagpakita sa padayon nilang pag-explore ug pag-test sa bag-ong teknolohiya aron maprotektahan ang integridad sa matag transaksyon.
Ang Globe nagpadayag usab nga ilang gi-engage ang ubang leading financial institutions ug e-commerce platforms aron mas mapalapad ang aplikasyon sa network-powered authentication, uban sa tumong nga makatukod og usa ka mas konektadong digital ecosystem diin ang pagsalig ug proteksyon naka-umol sa matag interaksyon.
Photo courtesy to: Daily Tribune
