Posibling ipagawas karong semanaha ang resulta sa physical exam o fitness to stand trial evaluation nga gihimo alang kang kanhi Presidente Rodrigo Duterte, sumala sa iyang abogado, si Atty. Nicholas Kaufman.
Gibutyag ni Kaufman nga ang accredited panel sa mga medical expert nga gitudlo sa International Criminal Court (ICC) nakigkontak na sa ilang kampo. Ang grupo gikatakdang mopagawas sa ilang mga findings sa Disyembre 5.
Sumala sa abogado, ang ilang depensa naglaum nga ang evaluation magpamatuod nga ang ilang pamahayag bahin sa kasamtangang kahimtang sa panglawas sa 80-anyos nga kanhi presidente husto. Ang kampo ni Duterte gikatakdang mosumite sa ilang tubag sa mga findings sa medical panel sa Disyembre 12.
Samtang, giangkon ni Kaufman nga ang kanhi presidente nasagmuyo apan wala matingala sa dihang gibasura sa ICC Appeals Court ang ilang hangyo alang sa interim release. Ang defense team nagpadayon usab sa paglaum nga ang desisyon sa ilang petisyon sa pagkuwestiyon sa hurisdiksyon sa ICC sa kaso batok kang Duterte ipagawas sa dili madugay.
Ang ubang mga resulta bahin sa maong petisyon gilauman nga ipagawas sa Enero 27 sa sunod tuig, human sa judicial recess sa ICC.
via: ICC
