Misaka na ngadto sa 146 ang patay sa sunog sa Wang Fuk Court sa Hong Kong, ang pinakagrabeng residential fire sa syudad sa daghang katuigan ug ang labing grabeng residential fire sa kalibutan sukad 1980.
Liboan ka tawo ang mitapok niadtong Domingo duol sa naguba nga apartment complex aron maghatag pagtahod sa mga biktima, samtang ang linya sa mga miduyog sa pagbangotan kapin usa ka kilometro.
Ang dugang nga mga lawas nakuha sa mga yunit sa building, hagdanan, hallway ug atop, samtang naglisod ang mga rescue teams tungod sa grabe nga pagkadaot sa struktura. Posibleng mosaka pa ang death toll samtang nagpadayon ang search operations.
Gitukod sa Hong Kong government ang interdepartmental task force aron tukion ang hinungdan sa sunog. Ang anti-corruption watchdog misikop og 11 ka persona nga adunay kalabotan sa insidente, samtang pipila giatubang ang kaso nga manslaughter. Nareport usab ang pag-aresto sa usa ka estudyante tungod sa sedition, human siya mag apod-apod og flyers nga nag-awhag og mas taas nga accountability sa gobyerno.
Nagpadayon ang imbestigasyon samtang nagpabilin ang kasubo sa komunidad sa usa sa pinakadakong trahedya sa kasaysayan sa Hong Kong.
Photo Courtesy to: CBS NEWS
