Gi-anunsyo sa Disaster Management Center (DMC) sa Sri Lanka niadtong Dominggo, Nobyembre 30 nga tungod sa paghapak ni Bagyong Ditwah misaka na sa 334 ka mga indibidwal ang kumpirmadong namatay tungod sa pagbaha nga miresulta sa pagdahili sa yuta sa lugar.
Ang maong ihap nadungagan nga gikan sa 212 nga adunay dul-an 400 nga namissing ug kapin sa 1.3 milyon nga mga tawo sa tibuok isla ang apektado sa natala nga pag-ulan.
Kahibaloan nga ang mga opisyal nag-ingon nga dako ang nahimong kadaot sa maong bagyo diin kini ang pinakagrabe nga katalagman nga miigo sa isla sulod sa duha ka dekada. Samtang padayon usab ang relief operation sa lugar ug gihinluan ang mga dalan tungod sa mga nakaharang nga kahoy.
Kahinumdoman nga niadtong 2004, dako ang nahimong damyos sa lugar human nga miigo ang usa ka tsunami nga mipatay ug kapin sa 31,000 ka tawo ug nagbilin ug kapin sa usa ka milyon ang nawad-an sa mga puy-anan.
Samtang si Presidente Anura Kumara Dissanayake nagdeklarar ug usa ka state of emergency ug misaad nga mapadali ang pagtukod ug bag-ong pinuy-anan alang sa mga naapektuhan uban sa internasyonal nga suporta. Nangandam na usab ang gobyerno sa Sri Lanka alang sa usa ka dakong relief operation alang sa mga naapektuhan.
Photo Courtesy to: MSN
