Gibarogan ni Atty. Gilbert Andres nga hulga sa seguridad sa mga biktima sa drug war, kung matuman ang hangyo ni kanhi Presidente Rodrigo Duterte alang sa temporaryo nga kagawasan sa detensyon.
Gitataw sa abogado nga kon mahitabo kini, morag patay na ang kaso batok kang Duterte. Matod niya, nga gusto sa mga biktima nga mapriso lang ang kanhi presidente sa International Criminal Court (ICC) Detention Facility ug kon mahatagan siya og temporaryong kagawasan, seguradong lain na usab kini nga hampak sa mga biktima.
Gihisgotan ni Andres ang mga panghitabo karon, diin giatake ang mga pamilya sa mga biktima sa lainlaing mga forum, labi na sa social media.
Kung buhian ang kanhi presidente, matod niya, mausab gayud ang domestic political scene sa Pilipinas ug mosaka lang ang lebel sa atake sa mga supak sa mga aksyon sa Duterte Administration, ilabi na kay matod pa niya, nga lapad pa ang impluwensya sa kanhing presidente.
Gipasabot sa abogado nga kining tanan maoy gitug-an sa Office of the Public Counsel for Victims dihang nisang-at kini og tubag sa hangyo sa kanhi presidente.
Nanghinaot ang abogado, nga makita sa ICC Appeals Chamber ang gikahadlokan sa kampo sa mga biktima ug ipadayon ang pagpapriso sa kanhi presidente.
Photo Courtesy to:Rightcon
