Nagpagawas og usa ka blue notice ang Interpol batok kang kanhi Ako Bicol Party-list Representative ug House Appropriations Committee chairman Zaldy Co kinsa nag-atubang og mga kaso kalabot sa giingong maanomalyang flood control projects (proyekto sa pagkontrolar sa baha), matod ni Interior Secretary Jonvic Remulla niadtong Lunes.
Matod sa Interpol, ang usa ka blue notice ginagamit aron mangolekta og dugang impormasyon mahitungod sa pagkatawo, lokasyon, o kalihokan sa usa ka tawo nga adunay kalambigitan sa usa ka imbestigasyon sa krimen.
Saysay pa ni Remulla nga dako ang ilahang pagtuo nga nagbiyahe siya gamit ang lain nga passport, padayon sab nilang ginaberipika kung naggamit ba si Co og laing ngalan.
Miingon si Remulla nga dili moubos sa 8 sa 16 ka indibidwal nga giakusahan sa pagkalambigit sa anomaliya sa pagkontrolar sa baha ang anaa na sa kustodiya sa National Bureau of Investigation niadtong Lunes sa buntag.
Dugang niya, ang duha sa mga akusado nga sila si Sunwest executives Aderma Angelie Alcazar ug Cesar Buenaventura gituohan nga anaa sa New Zealand ug New York. Samtang, si Montrexis Tamayo sa DPWH gidudahan nga anaa sa Jordan.
Gawas kang Zaldy Co, ang uban pang mga miyembro nga gituohang anaa sa gawas sa nasud nakigkontak na sa mga ahensya sa law enforcement ug gilauman nga mo-presentar sa embassy ug magsugod sa dinalian nga pagpauli sa Pilipinas.
Photo courtesy: Civils Daily
