Gibutyag sa Information and Communications Technology Center (ICTC) sa Iligan City, pinaagi sa pagpanguna ni OIC Head Nouvell Krish Aehmery A. Lagapa, ang ilang klarong direksyon ug nag-unang mga agenda sa buhatan.
Sumala ni Lagapa, ang top priority sa ICTC ning kasamtangan mao ang Digital Connectivity, nga nagtumong nga ihaom ang ilang mga programa sa Department of Information and Communications Technology (DICT) aron masubay ang National Broadband Plan ilawom sa Gov-Net Program.
Gipaklaro nga tinguha sa Gov-Net Program nga ang tanang ahensya sa gobyerno gikan sa national hangtod sa local level,maka-angkon ug lig-on, paspas, ug seamless nga interconnection, subay sa mandato sa DICT nga paglink sa tanang national government agencies ug local government units.
Gidugang pa sa ICTC nga ilang palapdan ang network padulong sa tanang government offices ug mga departamento ilawom sa DILG hangtod sa matag barangay. Tuyo niini ang paghatod ug mas episyente, mas paspas, ug mas digital-ready nga serbisyo para sa katawhan sa Iligan City.
