Gibutyag ni Department of Interior and Local Government (DILG) Secretary Jonvic Remulla nga katapusan nga nakita si kanhi Congressman Zaldy Co sa Japan.
Giluwatan sa kalihim ang pamahayag pipila ka oras human ipahibalo ni President Ferdinand Marcos Jr. nga adunay na’y gi-issue nga warrant of arrest batok kang Co ug sa 17 pang uban.
Sumala sa kalihim, karon nga adunay kaso nga gisang-at batok sa kanhing magbabalaod, mahimo na nilang i-apply ang red notice sa International Police kun (Interpol).
Nakatakda usab nga hangyuon sa DILG ang Department of Foreign Affairs (DFA) nga i-kanselar ang pasaporte ni Co. Apan sa usa ka statement, gipadayag sa DFA nga mahimong magkansela lamang sila og Philippine passport kung adunay court order gikan sa usa ka competent court sa Pilipinas.
Giklaro usab ni Sec. Remulla nga wala sila’y kasamtangang impormasyon kabahin sa lokasyon ni Co, apan iyang gimention ang mga miaging lugar nga giadtuan sa kanhi magbabalaod sama sa Amerika, Europe, Singapore, Portugal, Spain, ug katapusan sa Japan.
Samtang, giingon sa kalihim nga susihon usab sa mga awtoridad ang mga address sa mga balay ni Co sa Pilipinas sa pamasin nga nakabalik na kini sa nasud. Kahinumduman nga niadtong Setyembre karong tuiga, mibyahe paingon Amerika si Co aron magpatambal.
Sa iyang video statement nga gipagawas sa milabay nga mga semana, gisulti ni Co nga plano unta niyang mopauli sa Pilipinas pagkahuman sa State of the Nation Address kon SONA ni President Ferdinand Marcos Jr., apan iyang giingon nga gipugngan siya ni kanhi House Speaker Martin Romualdez ug matod pa gibaharan usab siya nga patyon kung musulti siya batok sa kanila.
Kahinumdoman nga sa mismong SONA sa Presidente niadtong Hulyo, iyang gibulgar ang mga palpak ug “ghost” nga flood control projects.
Photo courtesy to: Manilastandard.net
