Subay sa pag-apil sa nasud sa World Antimicrobial Awareness Week (WAAW) gikan sa Nobyembre 18 hangtod 24 ning tuiga, ang Philippine Health Insurance Corporation (PhilHealth) nanawagan ngadto sa publiko nga ipraktis ang responsable nga paggamit sa mga antibiotics.
Kini ang tinuig nga global nga pag-obserbar diin nagtumong sa pagpataas sa kahibalo sa katawhan mahitungod sa antimicrobial resistance (AMR) nga usa ka nagkadako nga hulga sa kahimsog sa tawo nga mahitabo kung ang mga antibiotics o uban pang mga tambal mahimong dili epektibo tungod sa sayop nga paggamit o sobra nga paggamit niini.
Kalabot niini, nagpasidaan ang mga eksperto nga kung mograbe ug molambo ang AMR mahimo kining musangpot ngadto sa lisod nga pagtambal tungod sa impeksyon ingon man mahimong moresulta sa grabe nga mga komplikasyon, pagtaas sa bayronon sa ospital ug risgo sa kinabuhi.
Gipahinumdoman usab sa PhilHealth ang mga Pilipino pinaagi sa ilang information campaign sa 3Ms alang sa saktong paggamit sa antibiotic, diin una na niini nga kinahanglang adunay reseta gikan sa doktor, susihon ug tumanon ang dosage og kadugayon sa pag-inom sa tambal samtang likayan usab ang pag-inom sa nahibilin nga mga tambal.
Sumala sa PhilHealth nga ang responsable sa paggamit sa antibiotic usa ka importanteng buhat aron nga malikay sa risgo sa kinabuhi ug mapanalipdan o mapugngan ang pagkaylap sa mga impeksyon nga dala sa tambal.
Photo courtesy to:PIA
