Pormal nga gisumite sa Department of Public Works and Highways (DPWH) ug Independent Commission for Infrastructure (ICI) ngadto sa Office of the Ombudsman kagahapong adlawa ang referral nga nagrekomendar sa pagpasaka og kasong plunder, graft, ug direct bribery batok kang kanhi House Speaker Martin Romualdez ug Ako Bicol Party-list Rep. Zaldy Co.
Matod ni DPWH Secretary Vince Dizon, wala nila iapil ang “online revelation video” ni Co sa ilang gisumite, ug gibase ang rekomendasyon sa mga dokumento ug ebidensya nga nahipos sa ICI.
Diin ang maong lakang kabahin sa mas dako nga imbestigasyon sa giingong mga iregularidad sa pipila ka mga proyekto sa imprastraktura. Kun asa si Romualdez, kinsa nagsilbi isip Speaker of the House hangtod sa 2024, dugay na nga usa sa labing gamhanan nga mga lider sa Kamara.
Samtang, si Zaldy Co nailhan nga usa sa mga nag-unang magbabalaod gikan sa rehiyon sa Bicol ug nahimong kabahin sa Committee on Appropriations.
Kahibaloan nga dugay na nga nalambigit ang ilang mga pangalan sa mga pasangil sa kurapsyon, apan karon pa lang aduna nay pormal nga referral nga gisumitir alang sa posibleng mga kaso nga ipasaka batok kanila.
Sa pagkakaron ang Ombudsman gipaabot nga mohimo og hingpit nga pagsusi sa mga dokumento ug rekomendasyon, ayha kini modesisyon kon aduna bay igong basehanan nga pormal nga pasakaan og kaso ang duha ka magbabalaod.
Photo courtesy to: Pep.PH
