Gipahibalo sa GCash nga fully restored na ang tanang serbisyo niini human kini dili magamit sa kadaghanan sa mga users sayo sa buntag Biyernes. Sa official Facebook page sa kompanya alas 4:08 sa hapon, gipahibalo nga wala na’y disruption og girekomendar nga i-restart sa gumagamit ang ilang device ug app aron masiguro ang hapsay nga operasyon.
Gipasabot sa GCash nga tanang apektadong transaksyon i-refund sulod sa 24 hangtod 48 oras ngadto sa ilang GCash wallet. Mas sayo pa, alas 7:21 sa buntag, ilang gi-anunsyo nga dili magamit ang Buy Load, Pay Bills, QRPH Payments, ug Bank Transfer. Wala nila gisulti ang hinungdan sa disruption, apan giingon nilang mas dugay ang restoration process kaysa sa ilang gilauman.
Giawhag usab sa GCash ang mga customers nga adunay dugang pang kabalaka nga moduol sa GCash Help Center ug hotline. Ang GCash karon ang labing gigamit nga e-wallet sa nasud nga adunay kapin 94 milyones ka users o walo sa matag napulo ka Pilipino.
Photo courtesy to: Gadgets Magazine
