Padayon ang tabang ug suporta nga ihatod sa probinsya sa Cebu ug ubang apektadong lugar sa Visayas human sa grabe nga kadaot nga gibilin sa Bagyong Tino. Kini ang klarong pasalig ni Presidente Ferdinand R. Marcos Jr. samtang nagpadayon ang disaster response ug relief operations sa mga komunidad nga pinakagrabe nga apektado.
Human sa briefing sa National Disaster Risk Reduction and Management Council (NDRRMC) sa Camp Aguinaldo, giingon sa Presidente nga gisiguro sa mga ahensya sa gobyerno ang padayun ang pag-apod-apod og pagkaon, tubig, temporary shelters, ug medical assistance sa mga pamilya nga nawadan sa kabalayan ug panginabuhi.
Gipasabot usab niya nga adunay koordinasyon tali sa lokal nga kagamhanan ug nasyonal aron mapadali ang pagresponde sa panginahanglan.
Apan samtang padayon ang pagtabang sa Cebu, gi-emphasize usab sa Presidente nga kinahanglan nga andamon ang mga probinsya sa amihanang Luzon nga kasamtangang gibantayan tungod sa posibleng pag-abot sa Super Typhoon Uwan.
Gipunting niya nga ang pag-andam daan maoy labing epektibong pamaagi aron mapamubo ang posibilidad sa mas dakong kadaut ug pagkawala sa kinabuhi.
Gibutyag usab ni Marcos Jr. nga dili pa makahatag og tinuok nga numero sa kinatibuk-ang pinsala ug casualty count tungod kay padayon pa ang pag-validate ug assessment sa mga lokal nga otoridad.
Nanawagan ang Presidente sa katawhan sa pagtinabangay ug pagsunod sa mga advisory sa otoridad, ilabina nga anaa pa sa hulga ang umaabot nga laing bagyo.
Photo courtesy: pbbm.com.ph
