Nipatawag ug pre-disaster preparedness meeting ang Local Government Unit (LGU) sa Maasim, uban sa tanang barangay kapitan niadtong Nobyembre 9, 2025, aron maseguro ang kaandam ug koordinasyon nga tubag sa munisipyo alang sa posibleng epekto sa Super Typhoon Uwan.
Atol sa tigom, gipasiugda sa alkalde sa maong lungsod ang kamahinungdanon sa sayo nga pagpangandam ug hugot nga koordinasyon sa mga opisyal sa barangay, emergency responders, ug lokal nga ahensya.
Iyang giawhag ang tanang barangay leaders nga i activate ang ilang tagsa-tagsa ka Barangay Disaster Risk Reduction and Management Councils (BDRRMCs) ug sugdan na ang pagpakatap sa mga safety advisories ngadto sa mga residente, ilabi na niadtong anaa sa high risk areas.
Ang MLGOO nga si Rodolfo Jerez naghatag ug mubo nga background bahin sa Super Typhoon Uwan, samtang si MDRRM Officer Arlene Hollero nagpresentar sa mga contingency plan sa munisipyo, nga naglakip sa pre-positioning sa mga relief goods, pagsiguro sa kaandam sa mga evacuation centers, ug pagpaaktibo sa emergency communication protocols.
Gipahinumdoman usab ang mga opisyal sa barangay nga padayon nga magmonitor sa weather updates ug makig alayon dayon sa LGU alang sa bisan unsang emergency assistance o evacuation nga panginahanglanon.
Ang Maasim LGU nagpasalig sa mga residente nga ang tanan nga kinahanglan nga mga lakang gipatuman aron mapanalipdan ang mga kinabuhi ug masiguro ang kaluwasan sa komunidad.
Photo Courtesy to:Maasim Information Office
