Gihikay na ni ML Party-list Representative Leila de Lima sa Kamara ang usa ka balaodnon nga nagtinguha nga mapaspasan ang pagtukod sa mga classroom pinaagi sa tabang sa mga lokal nga panggamhanan ug pribadong sektor.
Sa ilawom sa House Bill No. 5751 o ang “Classroom-Building Acceleration Program (CAP) Act,” tuyo niini nga masulbad ang dugay nang problema nga kakulangon sa mga lawak klasihanan sa tibuok nasud.
Sumala ni De Lima, kinahanglan gamiton ang “whole-of-nation approach” aron masulbad ang krisis sa edukasyon nga resulta sa kakulangon sa mga eskwelahan.
Sa maong balaodnon, ang Department of Education (DepEd) ug Department of Public Works and Highways (DPWH) magahatag ug tabang ug pagbansay sa mga local government units (LGUs) ug sa pribadong sektor aron makapartisipar sa pagtukod sa mga lawak klasihanan..
Base sa datos, adunay kapin 165,000 ka classroom nga kinahanglan pa nga tukuron sa nasud, ug posibleng molungtad pa ug 55 ka tuig ayha kini makompleto kung magpadayon ang kasamtangang hinay nga proseso sa pagtukod.
Gipasiugda ni De Lima nga kinahanglan ang paspas nga aksyon gikan sa gobyerno aron masiguro ang de-kalidad nga edukasyon alang sa tanang kabatan-onan.
Gisuportahan usab niya ang panawagan ni Senador Bam Aquino nga ipa-certify ang maong balaodnon isip urgent.
Photo courtesy to: verafiles.org
