Giaresto sa mga sakop sa Federal Immigration ang usa ka magtutudlo sa usa ka day care center sa Chicago human masayran nga kulang kini og dokumento alang sa legal nga pagpuyo sa Estados Unidos.
Sumala sa mga taho, misulod ang mga personahe sa Immigration and Customs Enforcement (ICE) sa Rayito de Sol Day Care School for Spanish Language, diin ilang giaresto ang magtutudlo sa atubangan mismo sa iyang mga estudyante.
Matod pa sa mga nakasaksi, gipugos siyang gigawas sa eskwelahan bisan wala ipakita sa mga awtoridad ang warrant of arrest.
Gipaila sa Department of Homeland Security ang magtutudlo nga si Diana Patricia Santillana Galeano, usa ka Colombian nga adunay work authorization aron makapagtudlo. Apan giklaro sa maong ahensya nga ang pagbaton og work authorization dili nagpasabot nga adunay siya’y legal nga katungod sa pagpuyo sa U.S.
Ang ingon niini nga mga operasyon batok sa mga imigrante nga walay igong papeles, kabahin sa kampanya ni U.S. President Donald Trump nga nagtinguha nga “limpyohan” ang Amerika gikan sa mga iligal nga imigrante.
Photo courtesy to: CNN
