Padayon ang paningkamot sa probinsya sa Bukidnon sa pag-edukar sa katawhan kabahin sa kahinungdanon sa kaalam sa sakit nga Human Immunodeficiency Virus (HIV) o HIV-AIDS, nga miusbaw ang kaso sa lalawigan.
Gikabutyag ni Provincial Health Education and Promotion Officer Ms. Avril C. Bughaw nga wala’y hunong ang probinsya sa pagpahibalo sa katawhan bahin sa maong sakit, hinungdan nga karon daghan na ang dili maulaw magpacheck-up ug aduna nay kaugalingong pagkahingawa sa ilang kahimsog.
Sa exclusive nga pakighinabi sa Juander Radyo Malaybalay, giingon ni Ms. Bughaw nga kini nga lakang usa ka positibong paagi aron makontrol ang pagsaka sa kaso sa HIV, labina sa LGBT community nga kasagaran maoy mga biktima.
Base sa report sa Regional Health Office, ang Valencia City ang ikatulo sa pinakadaghan og kaso sa Bukidnon, sunod sa Cagayan de Oro ug Iligan City, samtang ang Malaybalay City ikalima. Apan giingon nga kini nga numero dili usa ka negatibong timailhan, kondili positibong epekto sa Health Awareness Campaign sa gobyerno aron mapakunhod ang kahadlok sa katawhan sa pagpacheck-up ug pagpahibalo sa ilang kahimtang.
Lakip sa mga LGU nga adunay kaso sa HIV mao ang Maramag, Quezon, Manolo Fortich, ug uban pa. Kasagaran niini mga indibidwal nga nanguli gikan sa dagkong siyudad sama sa Cagayan de Oro ug Davao, diin sa Bukidnon nasayran nga wala silay HIV human sa check-up.
via: PHO –Bukidnon
