Gipahibalo sa US Geological Survey (USGS) nga gitay-og ug 6.3 magnitude nga linog ang amihanang bahin sa Afghanistan niadtong Dominggo sa gabii.
Sumala sa ahensya nga ang linog miigo sa giladmon nga 28 kilometros o 17 milya diin una nang giingon nga adunay giladmon nga 10 km lamang. Naigo kini sa Kholm nga duol sa lungsod sa Mazar-i-Sharif.
Kahinumdoman nga niadtong Agosto 31 kapin sa 2,200 ka mga tawo ang nakabsan sa kinabuhi human miigo ang 6.0 magnitude nga linog sa nasud ug sila nag-atubang usab sa problema maykalabotan sa kakabus ug uban pang mga kalisdanan.
Gikataho nga kasagaran ang mga linog sa maong nasud, maigo sa kabukiran sa Hindu Kush, duol sa kung diin nagtagbo ang Eurasian ug Indian tectonic plate.
Matod ni Brian Baptie, usa ka seismologist sa British Geological Survey nga sukad niadtong 1900 ang amihanan-sidlakan sa Afghanistan naigo sa 12 nga mga linog nga adunay magnitude nga 7.0 pataas.
Photo Courtesy to:RNZ
