Nagkahiusa ang mga lider sa labor ug business sectors sa panawagan ngadto ni Pangulong Ferdinand Marcos Jr. nga sulbaron ang gitawag nilang pinakadako ug pinakalapad nga korapsyon sa kasaysayan sa Pilipinas.
Matod sa Trade Union Congress of the Philippines (TUCP) spokesperson nga si Carlos Miguel Oñate, dili na igo ang mga saad ug pasalig sa gobyerno tungod kay naglagot na ang katawhan.
Lakip sa ilang “five-point wishlist” alang sa administrasyon mao ang, pagpatawag og tinuod nga pagpulong sa labor ug business sectors, pagdeklara nga urgent ang balaod nga maghatag og full contempt ug subpoena powers sa Independent Commission for Infrastructure, pagpahigayon og transparent hearings, paghimo og special petition sa Sandiganbayan alang sa infrastructure corruption cases, ug pagbawi sa mga gipangkurap ug pag-institutionalize sa multisectoral participation.
Gipasiugda ni Oñate nga ang tumong sa ilang sulat mao ang pagsiguro nga ang anti-corruption campaign sa administrasyon dili lang soundbite o selective justice, apan tinuod nga national renewal ug hustisya.
Nagtuo usab sila nga kung paminawon sa administrasyon ang ilang panawagan, posibleng adunay madakpan o mapriso sa dili pa mahuman ang tuig.
Photo Courtesy to:The Bench files
