Lauman ang mga pagbaha sa pito ka rehiyon sa nasud tungod sa epekto sa Intertropical Convergence Zone (ITCZ) ug easterlies.
Tungod niini, nagpagawas ang state weather bureau og general flood advisories alang sa mga lugar nga posibleng makasinati og hinay hangtod kasarangan nga pag-ulan.
Apil sa mga lugar nga posibleng maapektuhan ang MIMAROPA, Eastern Visayas, Western Visayas, Central Visayas, Zamboanga Peninsula, Soccsksargen, ug ang Bangsamoro Autonomous Region in Muslim Mindanao (BARMM).
Base sa monitoring sa weather bureau, wala nay gibantayang Low Pressure Area (LPA) sa sulod o gawas sa Philippine Area of Responsibility (PAR) human matunaw ang LPA nga kataposang namataan sa silangan sa Pag-asa Island, Kalayaan, Palawan.
Bisan pa, makaapekto gihapon ang ITCZ ug magdala og gamay nga panganod sa kalangitan nga adunay panagsa nga pag-ulan sa ubang bahin sa Visayas ug Mindanao.
Samtang gilauman usab nga ang easterlies makahatag og panagsa nga pag-ulan ug mga dalugdog (thunderstorms) sa Metro Manila ug ubang bahin sa Luzon, gawas sa Cagayan ug Batanes.
Photo Courtesy to:BRN
