Opisyal nang gilunsad sa Department of the Interior and Local Government (DILG) ubos sa pagpangulo ni Secretary Juanito Victor “Jonvic” Remulla ang Unified 911 Emergency Hotline System sa Central Visayas niadtong Oktubre 25, 2025, sa PLDT Jones, Cebu City.
Kini nga programa mao ang pagtuman sa direktiba ni Pangulong Ferdinand R. Marcos Jr. aron mapalambo ang mga serbisyo sa gobyerno ug masiguro nga ang matag Pilipino adunay dali nga akses sa tabang panahon sa emerhensiya.
Kauban sa kalihim si Acting Chief PNP Police Lieutenant General Jose Melencio C. Nartatez Jr., nga mipasabot nga ang proyekto usa ka dakong kabahin sa paningkamot sa PNP aron mapaayo ang koordinasyon tali sa mga ahensya sa gobyerno. Sumala pa niya, pinaagi sa Unified 911, mas paspas ug ang pagtubag sa mga tawag sa emerhensiya, nga makasiguro sa kaluwasan ug kahapsay sa publiko.
Gipasiugda ni Secretary Remulla nga ang Unified 911 System nagahatag og pagrespeto sa wika, kultura, ug tradisyon sa matag Pilipino. Gipahibalo usab niya nga adunay 200 ka bag-ong patrol car nga ipang-apod-apod sa Central Visayas sa Enero 2026 aron mapaligon ang operasyon sa kapulisan. Dugang pa niini, iyang gipaila ang “Skynet Initiative”, usa ka programa nga maggamit og long-range drones alang sa real-time surveillance ug tabang sa mga emerhensiya.
Gipasalamatan usab ni Cebu Governor Pamela S. Baricuatro ang PNP ug DILG sa maong inisyatibo, samtang iyang gibutyag nga mikunhod og 41% ang kaso sa krimen sa lalawigan. Nagpasalamat usab siya kang Presidente Marcos ug DILG Secretary Remulla sa pagsuporta sa programa ug misaad sa tibuok suporta sa provincial government sa pagpasiugda niini.
Mitanbong usab sa maong seremonya ang mga opisyal sa lokal ug nasyonal nga lebel, lakip sila Cebu City Mayor Nestor Archival, Mandaue City Mayor Thadeo Jovito Ouano, Lapu-Lapu City Mayor Cindi King Chan, ug mga representante sa DILG, NAPOLCOM, ug Bureau of Fire Protection.
Ang Unified 911 System usa ka timaan sa “Bag-ong PNP para sa Bag-ong Pilipinas” – serbisyong madasigon, matinud-anon, ug dali maabot sa katawhan.
Photo courtesy: Philippine National Police
