Gisuspende sa Land Transportation Franchising and Regulatory Board kon (LTFRB), ang operasyon sa 22 ka mga bus pasaheroan tungod sa mga kalapasan, lakip na ang dili pagsunod sa limpyo ug hamugaway nga mga terminal.
Matod ni LTFRB Chairman Atty. Vigor Mendoza II, nag isyu sila og notification sa suspension ug show cause orders kon (SCOs) sa duha ka bus companies, nga Elavil Tours, Phils, Inc., ug AMV Travel and Tours, Inc.
Gisuspende sa ahensya ang 17 ka mga bus gikan sa Elavil Tours sulod sa panahon nga dili molapas sa 30 ka adlaw, samtang lima gikan sa AMV Travel and Tours.
Sa managlahing mga SCO, gimanduan usab sila nga iuli ang ilang for-hire plates ug mosumiter og notarized explanation, kon nganong dili angay suspindihon o bawion ang ilang prangkisa.
Dugang ni Mendoza II, nga angay kining magsilbi nga pasidaan sa mga bus companies sa pagtuman sa minimum standard, alang sa luwas nga operasyon ug pagmentinar sa mga estasyon ug terminal nga passenger-friendly stations.
Gawas niini, gisusi pa ni Transportation Secretary Giovanni Lopez kon duna bay laing kalapasan nga nahimo ang Elavil Tours, human nasakpan nga ilegal nga nag-operate og terminal sa Pasay City, diin gimando na kini sa kalihim.
Photo courtesy to:PTV News
