Gikatakdang magpadala og mga assessment teams ang Department of Public Works and Highways (DPWH) nga mosusi sa nahugno nga bahin sa Bukidnon-Davao Road tungod sa padayong pag-uwan sa lugar.
Gimando dayon ni DPWH Secretary Vince Dizon ang temporaryong pagsira sa dalan sa nasangpit nga karsada aron masiguro ang kaluwasan sa publiko samtang ang mga engineers sa iyang buhatan mohimo og hingpit nga imbestigasyon aron masuta ang hinungdan ug gidak-on sa kadaot.
Matod sa kalihim, kini isip tubag sa direktiba ni Presidente Ferdinand Marcos Jr. nga ibalik dayon ang mobilisasyon sa lugar nga moagi sa nasangpit nga main road.
Ang Bukidnon-Davao Road (BuDa Road) nagsilbi nga pinakadako nga transport link sa mga motorista sa pagpadala sa mga produkto tali sa mga rehiyon sa Northern Mindanao ug sa Davao region.
Samtang, tungod sa temporaryo nga pagpasira, gitambagan ang mga motorista nga gamiton ang highway paingon sa Kabacan sa Cotabato Province.
Nipasalig ang DPWH nga mohatag dayon sila og updated reports kalabot sa ilang imbestigasyon sa higayon nga masugdan na ang aktuwal nga pag-ayo ug rehabilitasyon sa nahisgutang dalan.
Photo courtesy to:Assistance.ph
