Gipasabot ni Princess Almerah D. Lucman – Provincial Head sa National Commission on Muslim Filipinos (NCMF) ang kamahinungdanon sa Halal products sa dakbayan sa Iligan. Giila niya nga ang pagka-halal sa usa ka produkto dili lang nagpasabot nga kini libre sa ginadili nga karne sama sa baboy, apan nagkinahanglan usab og hustong proseso sa pag-ihaw.
Gipatin-aw ni Lucman nga ang hayop kinahanglan nga susihon kung kini himsog, ug ampoan ayha ihawon, aron matuman ang espiritwal ug legal nga pamalaod sa pagka-halal. Giila kini nga importante sa pagsiguro nga ang pagkaon nga gitanyag sa mercado nagtuman sa sagrado nga pamalaod sa Islam.
Gidayeg usab niya si Iligan City Mayor Frederick Siao sa plano niini nga magtukod og Halal Slaughterhouse sa syudad. Gitumbok nga kini nga inisyatibo makatabang sa paglikay sa pagsagol sa ginadili nga karne atol sa proseso sa pag-ihaw usa ka dakong lakang padulong sa mas limpyo ug halal nga pagkaon alang sa tanan.
