Gitutokan sa kadumalahan sa Economic Enterprise Development and Management Office (EEDMO) ang positibong kalambuan sa mga economic enterprise sa syudad, ilabina sa operasyon sa mga pampublikong merkado nga gipanag-iya sa lokal nga panggamhanan.
Sa usa ka pamahayag, giingon sa EEDMO nga padayon ang ilang paningkamot sa pagpalambo sa serbisyo ug operasyon, nga naglangkob sa mas episyenteng pagdumala sa mga pasilidad ug paghatag og dekalidad nga serbisyo sa katawhan.
Gibutyag ni Agnes Clerigo-Maingat -EEDMO Head, nga ang Tambo Public Market sa Barangay Hinaplanon ang usa sa ilang gihatagan ug pagtagad. Matod pa sa EEDMO, naghimo na sila ug lakang aron masiguro ang kalimpyo ug hapsay nga operasyon sa maong merkado. Kini nga inisyatibo gitumong sa pagserbisyo sa publiko nga aduna’y dignidad ug kahapsay.
Gipasabot ni Maingat, nga ila na usab gihingusgan ang pagsulbad sa dugay nang problema sa atop sa merkado, nga sagad mo-leak kon adunay kusog nga ulan. Dugang pa, gipahugtan na sa EEDMO ang pagdili ug kontrolado nga pagpahimutang sa mga extension nga gihimo sa pipila ka mga market vendors, ilabina sa mga makababag sa hallway o pasilyo sa merkado.
Ang maong lakang gipatuman aron masiguro ang kaluwasan ug kasayon sa kalihokan sa sulod sa merkado, nga makapahimo sa mas limpyo ug luwas nga palibot para sa tanang mamalitay ug mga vendor.
Gidason pa ni Maingat nga padayon ang ilang paningkamot nga mapaayo ang serbisyo publiko pinaagi sa transparent ug responsable nga pagdumala sa mga economic enterprise sa Iligan City.
