Gipaimbestigahan ni Senate Committee on Basic Education Chairman Senador Bam Aquino ang kaandam sa mga public school building sa tibuok nasud kung dunay kusog nga linog nga moigo, human sa mga nahitabong pagtay-og sa lain-laing lugar.
Sumala ni Aquino, magmugna siya og resolusyon aron masuta ang kalig-on ug kaluwasan sa mga school building batok sa linog.
Gipunting sa senador ang kamahinungdanon sa pagsiguro sa kaluwasan ug kalidad sa mga building sa mga tungha-an, ilabi na human sa pag-angkon ni kanhi Department of Public Works and Highways (DPWH) Assistant District Engineer Brice Hernandez nga tanan nga proyekto sa imprastraktura sa Bulacan gikan 2019 hangtod karon ang matod pa substandard, apil na ang mga classroom.
Tukion usab ni Aquino ang pagahin og dugang pondo alang sa inspeksyon ug pag-assess sa mga public school building aron masiguro ang kalig-on ug kaluwasan.
Gawas sa pagsusi sa kalig-on ug kaluwasan sa mga school building, gibutyag ni Aquino nga apil sa planong imbestigasyon mao ang pagtan-aw sa mga kadaot nga gidala sa mga miaging linog ug ang mga lakang nga gihimo sa mga ahensya aron masiguro nga magamit dayon sa mga estudyante ang mga apektadong tunghaan.
Apil usab sa imbestigasyon ang mga plano nga lakang aron mapalig-on ang disaster preparedness sa mga tunghaan, sama sa regular nga inspeksyon, pagpahigayon ug earthquake drills ug evacuation protocols, ug pagbaton sa mga earthquake emergency kit.
Photo courtesy to: thesummitexpress.com
