Gipasidunggan ni US President Donald Trump ang mga nasud nga Egypt, Turkiye, ug Qatar tungod sa ilang papel isip tulay sa pag-abot sa kasabutan sa ceasefire tali sa Israel ug Hamas sa Gaza.
Personal nga mipirma si Trump sa kasabutan nga naglatid sa pagpatuman sa ceasefire deal tali sa duha ka panig aron tapuson ang padayon nga tensyon ug kagubot sa Gaza Strip.
Matod ni Trump, nagsugod na ang maayong resulta sa kasabutan, diin mikunhod ang mga engkwentro ug nagpakita kini og posibilidad sa mas lig-on nga kalinaw sa rehiyon.
Iyang gipasigarbo nga daghan ang wala motuo nga posible kining maabot, apan tungod sa padayon nga pagpursige ug diplomatikong paningkamot, nahimo kining tinuod.
Una pa niini, mibisita si Trump sa Israel aron personal nga pasalamatan ang mga lider sa nasud tungod sa ilang kooperasyon sa pagpanguna sa ceasefire.
Samtang, gipahibalo nga gipagawas na sa Hamas ang 20 ka bihag nga ilang gihuptan, kapalit sa 2,000 ka mga piniriso nga gibuhian sa panig sa Israel diin usa kini ka lakang nga giisip nga dakong timaan sa pagluag sa tensyon ug pag-abli sa posibilidad sa dugayng kalinaw sa Gaza.
Photo credit: Al Jazeera
