Nagsugod na og pamauli ang libuan nga mga Palestinian sa ilang tagsa-tagsa ka mga pinuy-anan sa amihanang bahin sa Gaza human hingpit nga na-epektibo ang ceasefire o hunong-buto tali sa Israel ug Hamas niadtong Biyernes, Oktubre 10.
Mapailubon nga gilaktan sa daghang Palestino ang taas ug abog nga dalan gikan sa habagatan paingon sa amihanang Gaza, dala ang ilang mga bagahe. Ang uban nagsakay og bisikleta o kotse.
Bisan pa man nga ang ilang abtanan ang guba nilang mga pinuy-anan nga gibiyaan tungod sa duha ka tuig nga gubat, usa kini ka kahupayan alang kanila nga sa katapusan makabalik na sila sa ilang mga balay ug naglaum nga kini na ang sinugdanan sa tinuod nga pagtapos sa gubat.
Alang sa daghang residente usab sa amihanang Gaza, kini ang ikaduhang higayon nga mosulay sila og balik sa ilang mga pinuy-anan human sa kataposang ceasefire niadtong Enero.
Matod sa Israeli Defense Forces (IDF) spokesperson, gitugotan na ang mga molupyo nga mobalik gikan sa habagatan paingon sa amihanan pinaagi sa pag-agi duol sa baybayon sa Al-Rashid Street ug Salah al-Din Road sa sentro sa Gaza Strip.
Gikumpirma usab ni Gaza civil defense spokesman Mahmud Bassal nga anaa na sa 200,000 ka Palestino ang nakabalik sa amihanang Gaza sukad na-epektibo ang ceasefire.
Photo courtesy: Truthout
