Gisugyot sa hawanan sa konseho nga maghimo og sanitary landfill alang sa duha ka distrito ning dakbayan, tungod na sab sa dili maayong kahimtang sa landfill nga nahimutang sa Barangay Pagalungan.
Kini gisugyot ni konsehal Maximo Rodriguez III base na sab sa ilahang panaghisgot sa nilabay nga mga committee meeting kung asa aduna na silay inisyal nga panaghisgot tali kang Bugo Barangay Kapital Spencer Cailing isip potential site ang ilahang barangay nga butangan og landfill alang sa distrito dos.
Gawas sa lisod nga dalan paingon sa Pagalungan landfill, nagkaanam na sab kini og kapuno labi pa dose sa baynte ektarya niini ang napuno na sa basura. Dugang gihisgutan sa Konsehal nga maghimo sab og garbage container stations aron nga maminusan ang congestion sa Pagalungan.
Apan sa pikas bahin, taliwala sa gipanghimo nga mga lakang sa syudad, nagpagula kaniadtong Oktubre 8 og ceast and desist order ang Environmental Management Bureau (EMB X), aron hunungon ang operasyon sa waste transfer station nga nahimutang sa Zone 3, Barangay Pagatpat ning syudad tungod sa wala kini saktong pagtugot gikan sa buhatan.
Dili lang sab kini ang unang higayon nga nagpagula og ceast and desist order ang EMB X ngadto sa syudad, apan sa nilabayng bulan gipahunong sab ang paglabay og basura sa Pagalungan partikular na sa mga erya nga walay liner.
Photo Courtesy to:DENR Northern Mindanao
