Padayong gisuta sa mga otoridad ang hinungdan sa mga dagkong liki nga mitungha sa yuta sa Sitio Kipaling, Barangay New Compostela, Damulog, Bukidnon.
Ang Mines and Geosciences Bureau (MGB) Region 10, uban sa Municipal Disaster Risk Reduction and Management Office (MDRRMO) Damulog, mihimo bag-o lang sa inspection ug assessment aron masuta ang kalihukan sa yuta ug matino kung adunay hulga sa kaluwasan sa mga residente.
Matod sa MDRRMO Damulog, ikaduhang higayon na kini nga adunay susamang insidente sa maong lugar, ug upat ka panimalay na ang napugos nga mibakwit aron malikayan ang peligro tulo ka tuig na ang milabay.
Sa eksklusibong pakighinabi sa Juander Radyo Malaybalay, ni James Colegio, LDRRMO Head sa MDRRMO Damulog, mitug-an nga una nang na-inspeksyon sa Department of Public Works and Highways (DPWH) ang lugar aron matino kung unsay angay nga proyekto aron makapugong sa dugang kadaot samtang gihulatan karon ang resulta sa MGB assessment alang sa tukmang lakang.
Nasayrang base sa unang imbestigasyon, nakit-ang hinungdan sa mga liki mao ang kalidad sa yuta nga tubigon sa ilalom, sanglit walay fault line sa lugar base sa assessment sa PHIVOLCS.
Ang mga datos nga nakolekta sa inspeksyon gamiton isip basehan sa mga rekomendasyon ug mitigasyon plan aron maprotektahan ang mga lumulupyo batok sa geohazard risks sama sa landslide o pagkahugno sa yuta.
Ang LGU Damulog nagpasalig nga magpadayon sa paghatag og update sa publiko kon unsa ang resulta sa evaluation ug mga lakang nga ipatuman sa maong dapit.
via: Mdrrmo Damulog
