Mibalibad sila si Senador JV Ejercito ug Raffy Tulfo sa pagpangulo sa Senate Blue Ribbon Committee nga nag imbestigar sa giingong kurapsyon sa flood control projects. Kini human ni-resign si Senate President Pro Tempore Ping Lacson taliwala sa mga pasangil ug kasagmuyo sa pipila ka mga senador sa direksyon sa imbestigasyon sa komite.
Matod ni Tulfo, bisan og nalipay siya nga nalakip ang iyang pangalan sa konsiderasyon, apan dili siya modawat sa pagpangulo niini tungod kay dili niya gusto nga mawad-an og pagtagad sa tulo ka committee chairmanship nga iyang gihuptan karon.
Sa bahin ni Ejercito, bisan og mapasalamaton siya sa pagsalig sa iyang mga kauban sa Senado, nipili siya sa pagbalibad tungod kay matod niya mas daghan ang mga senador nga dunay potensiyal mangulo sa komitiba.
Dugang pa ni Ejercito nga personal niyang gisultihan si Senate President Vicente Sotto III nga mag recommend nalang og laing senador sa maong posisyon.
Sa laing bahin, nanghinaot ang senador nga makonsiderar na usab ni Senador Lacson ang iyang pagluwat sa katungdanan tungod kay matod niya naklaro na ang mga isyu nga misangpot sa iyang desisyon. Gipasalig usab ni Ejercito nga walay dumot tali sa mga senador kalabot sa maong butang.
Photo Courtesy to:Daily Tribune
