Nagpatuman og price freeze ang Department of Trade and Industry sa mga probinsiya ug lungsod nga naigo sa Super Typhoon Nando ug Severe Tropical Storm Opong.
Kini naglangkob sa Cagayan, Masbate, Oriental Mindoro, Biliran, Romblon, ug mga lungsod sa Pagudpud sa Ilocos Norte, Dagupan sa Pangasinan, Calbayog ug San Vicente sa Samar, ug Ibajay Aklan.
Matod sa DTI, nagpabiling stable ang presyo sa mga nag unang palaliton ug staple products sa mga lugar nga naapektuhan sa bagyo.
Bisan pa sa temporaryo nga pagsira sa pipila ka mga negosyo, kadaghanan sa mga merkado, groceries, ug mga supermarket sa Masbate abli ug ang gidaghanon sa mga kustomer mibalik na sa normal.
Nipasidaan ang ahensya nga ang paglapas sa automatic price freeze adunay silot nga usa ngadto sa napulo ka tuig nga pagkabilanggo ug multa nga ₱5,000 ngadto sa ₱1 milyon ubos sa Price Act.
Samtang, ang DTI nipasalig nga padayon kining nakig alayon sa mga distributor ug retailers aron mamentinar ang igong suplay sa mga batakang palaliton sa mga apektadong lugar.
Photo Courtesy to:Philippine News Agency
