Nagpahimangno ang World Health Organization (WHO) kalabot sa subling pagsaka sa kaso sa sakit nga chikungunya sa tibuok kalibutan, diin 40 ka mga nasud ang nakatala og mga kaso karong tuiga, lakip na ang mga rehiyon nga dugay nang walay natalang impeksyon.
Sumala sa taho sa WHO, gikan sa Enero hangtod Setyembre 2025, miabot sa 445,271 ang total sa gidudahan ug kumpirmadong kaso, ug 155 ang nahikabsan sa kinabuhi.
Bisan pa sa pagsaka sa mga kaso sa pipila ka rehiyon kon itandi sa 2024, naglisod ang WHO sa pagdeklara sa maong sakit nga mitaaas na ang kaso sa tibuok kalibutan.
Ang nag-unang hinungdan sa paggrabi sa risgo sa lokal nga pagkaylap mao gihapon ang pagbiyahe sa mga tawo nga natakdan ug ang presensya sa lamok nga Aedes, o ang mananap nga nagdala sa virus.
Dugang pa, ang kakulang sa resistensya sa populasyon, ang pagdaghan sa mga tawo sa siyudad, ug ang epekto sa climate change mao usab ang gitan-aw nga mga rason sa pagkaylap sa chikungunya.
Tungod niini, padayon ang panawagan sa WHO sa tanang nasud nga palig-onon ang ilang surveillance system, pahugtan ang pagkontrol sa mga lamok, ug andamon pag-ayo ang mga pasilidad sa panglawas aron malikayan ang dugang pang pagkatap sa maong sakit.
Photo Courtesy to:Thinkglobal Health
