Mibuga na usab og abo ang Bulkang Kanlaon sa Negros Island niadtong Domingo sa buntag, sumala sa taho sa Philippine Institute of Volcanology and Seismology (PHIVOLCS). Base sa report sa Kanlaon Volcano Observatory, nagsugod ang ash emission pasado alas-8 sa buntag, ug kini namataan sa palibot sa bung-aw sa bulkan.
Sa video footage nga gipagawas sa PHIVOLCS, klaro nga makita ang abohon nga aso (greyish plumes) nga misaka og kinyentos (500) metros ang kataas gikan sa bung-aw, ug midrift paingon sa habagatang-kasadpang direksyon.
Taliwala sa maong pag-alburoto, nagpabilin sa Alert Level 2 (Increased Unrest) ang kahimtang sa bulkan. Sa milabayng adalw, nakarehistro ang PHIVOLCS og saysentay singko (65) ka volcanic earthquakes ug mil saysentos trentay otso (1,638) tonelada nga sulfur dioxide nga gibuga sa palibot sa bulkan.
Gawas pa niini, nakapamatikod usab og moderate plumes nga misaka og saysentos singkwenta (650) metros ang kataas, nga nadala sa hangin paingon sa kasadpan-aminhan kasadpan.
Tungod sa peligro, gipahimangnoan sa PHIVOLCS ang publiko nga likayan ang pagsulod sa 4-kilometer radius permanent danger zone (PDZ) sa palibot sa bulkan. Gidili usab ang paglupad sa mga eroplano duol sa maong dapit.
Photo courtesy to: Pilipino Mirror
