Misurrender na sa National Bureau of Investigation (NBI) ang duha sa lima ka suspek nga nalambigit sa pagpatay kang Wesley Barayuga, board secretary sa Philippine Charity Sweepstakes Office (PCSO).
Personal nga misurrender si Nelson Mariano, ang kanhing pulis, sa NBI Organized Transnational Crime Division niadtong Lunes, samtang si Santie Mendoza misurrender usab niadtong Martes sa NBI Iloilo Office.
Sumala sa NBI, importante kaayo ang testimoniya sa duha kay sila ang nagsilbing middlemen nga adunay kalabotan sa direktang nagplano sa krimen.
Kasamtangang gihuptan sa NBI head office ang duha samtang nagpaabot sa commitment order gikan sa korte.
Mahinumduman nga nagpagawas na og warrant of arrest batok kang kanhing PCSO general manager ug retired police colonel Royina Garma, kanhing National Police Commission commissioner Edilberto Leonardo, ug pulis nga si Jeremy Causapin tungod sa pagpatay kang Barayuga niadtong 2020.
Nakig-coordinate na usab ang NBI sa International Police Organization o Interpol aron pangitaon si Garma. Mibyahe si Garma paingon sa Malaysia aron makigkita sa opisyal sa International Criminal Court kay andam siya nga maghatag og testimonya batok kang kanhing Presidente Rodrigo Duterte
Photo Courtesy to: UNTV WEBFLOW
