Gisaad sa Department of Finance ubos ni Finance Secretary Ralph Recto nga paspasan ang paghatag og ayuda sa mga apektado sa 6.9 magnitude nga linog sa Cebu. Giingon ni Recto nga andam gamiton ang pondo sa Quick Response Fund ug National Disaster Risk Reduction and Management Fund para sa relief operations, repair sa mga nadaot nga pasilidad ug imprastruktura, ug pagtabang sa mga pamilya nga naapektuhan.
Gimandoan ni Recto ang mga government financial institutions ug GOCCs nga paspasan ang serbisyo sama sa calamity loans, cash aid, insurance claims, ug uban pang ayuda. Apil na niini ang Social Security System nga nag-andam og 10 hangtod 15 bilyon pesos para sa Calamity Loan Program, ang GSIS nga nagpatuman og calamity ug emergency loans, ug ang Pag-IBIG nga motugot sa calamity loans ug insurance claims sa mga nadaot nga balay.
Mopadali usab ang Land Bank sa paghatag og salary loans alang sa mga empleyado sa gobyerno ug pribadong kompanya nga adunay payroll accounts sa bangko. Samtang ang Bureau of the Treasury andam mosang-at og claim ubos sa National Indemnity Insurance Program para sa rehabilitasyon sa mga pampublikong tunghaan nga nadaot sa linog.
Matud pa ni Recto, ang tumong sa gobyerno mao ang pagpasiguro nga ang GFIs ug GOCCs maoy unang motabang sa katawhan ug makig-alayon sa tanang ahensya aron paspas nga makabangon ang mga biktima.
SOURCE: PNA
