Nataptan ang Lima ka bulan nga masuso ang pinakabata nga pasyente sa kaso sa suka kalibang kon Accute Gatroenteritis kon AGE sa dakbayan, kini gibutyag ni City Health Officer Rachel Dilla atol sa gipahigayong press briefing kagahapong adlawa.
Saysay ni Dr Dilla, sa bulan palang sa Septiyembre karong tuiga, niabot sa 600 ang kaso sa AGE nga natala sa City Health Office. Labing mas taas kung itandi sa natalang 200 ka kaso sa tibuok tuig sa 2024.
Sa 600 ka kaso, 219 ang naopsital, samtang 277 ang out-patient ug ang uban wala na nagpakonsulta ug nagpaayo na lamang sa ilahang mga balay.
Giklaro sab niini nga walay direktang relasyon ang natalang taas nga kaso sa suka kalibang diha sa mga nagpasad nga basura nga ning kasamtangan gi-anam anam na sab paghipos.
Kahibaluang, kadaghanan sa mga pasyente nikaon sa mga food establishments sulod sa usa ka dakong mall dinhi sa dakbayan ayha nakasinati sa suka kalibang.
Wala na sab panganli ni Dr Dilla ang mga establisyemento nga gikuhaan og water sample ug nagpositibo sa water contamination. Padayon sab ang ilahang ginahimong lakang, sa pakigtambayayong sa COWD ug uban pang departamento aron nga mawagtang ug dili na madugangan ang kaso sa suka kalibang dinhi sa syudad.
Phot courtesy: City Information Office
