Nigula nga positibo sa bacterial contamination ang resulta sa gihimong ekasminasyon sa mga water sample gikan sa mga establisiyemento sa dakbayan partikular na sa downtown area nga gikalambigit sa natalang daghang kaso sa suka kalibang.
Kahibaloang naglunsad og joint inspection and water sampling ang Cagayan de Oro City Water District (COWD) ug City Health Office (CHO) aron na usab matubag ang problema sa taas nga kaso sa Accute Gastroenteritis sa syudad.
Sa official statement nga gipagula sa COWD, nasuta nga positibo sa bacterial contamination ang mga water sample gikan sa mga storage facilities ug in-house system sa pipila ka mga establisyemento, samtang ang tubig nga direktang gikan sa mainlines sa COWD nagnegatibo sa bacterial contamination.
Tungod niini, padayon nga nakigtambayayong ang COWD ngadto sa CHO aron nga maaksyonan kini nga resulta. Samtang padayon usab nga gipahimangnoan ang katawhan nga muinom lamang og pinabukalan, treated or bottled water, perming manghugas sa kamot, regular nga paghinlo sa mga water storage, ug daling ireport ngadto sa COWD kung adunay makitang leaking sa mga linya sa tubig o nalubog sa mga drainage ug kanal.
Photo courtesy: COWD
