Gisiguro sa Department of Social Welfare and Development (DSWD) ang paghatag dayon og tabang sa mga pamilya nga namatyan tungod sa kusog nga linog nga mihapak sa Lalawigan sa Cebu. Lakip niini mao ang pag-shoulder sa tanang gasto alang sa paglubong sa mga biktima.
Sumala ni DSWD Assistant Secretary Irene Dumlao, gawas sa burial assistance, matag pamilya nga naulila makadawat usab og ₱10,000 nga pinansyal nga ayuda gikan sa maong ahensya.
Karon, padayon nga gihimo sa DSWD Field Office Central Visayas ang pagsusi ug pagkolekta sa eksaktong ihap sa mga namatay, samtang padayon usab ang pagsaka sa gidaghanon sa mga biktima nga namatay, nasamdan ug gi-report nga nawala tungod sa magnitude 6.9 nga linog nga mitay-og sa Central Visayas.
Gipahibalo usab sa DSWD nga gideklarar na ang Lalawigan sa Cebu ubos sa State of Calamity. Ang tumong niini mao ang pagpadali sa paglihok sa mga ahensya sa gobyerno ug sa paghatod sa gikinahanglan nga ayuda ngadto sa mga apektadong residente.
Dugang pa ni Dumlao, personal nga naglibot si Secretary Rex Gatchalian sa lalawigan aron masaksihan ang aktuwal nga kahimtang ug masuta ang mga kinahanglanon sa mga apektadong pamilya.
Giklaro usab sa ahensya nga walay pamilya nga pasagdan ug ang matag-usa makadawat sa igo ug hustong tabang gikan sa gobyerno.
Photo courtesy: Juan Carlo de Vela
