Misaka na ngadto sa 60 ang gikataho nga patay human sa kusog nga linog nga niigo sa Bogo City, Cebu niadtong Martes sa gabii, base sa datos sa Office of Civil Defense (OCD) kagahapong adlawa.
Matod ni OCD officer-in-charge Assistant Secretary Bernardo Rafaelito Alejandro IV sa press conference nga nagpadayon pa sila og pagdawat og dugang report sa mga biktima ug dili pa kini hingpit nga klaro ang ihap. Dugang pa niya, “Anaa na sa 60 ka indibidwal ang gitaho nga namatay tungod sa linog.”
Ang magnitude 6.9 nga linog nahitabo alas 9:59 sa gabii, sumala sa Philippine Institute of Volcanology and Seismology (PHIVOLCS). Una kini nga gi-report nga magnitude 6.7 apan gi-update ngadto sa 6.9.
Ang epicenter sa linog anaa 17 kilometros sa amihanan-sidlakan sa Bogo City, Cebu, nga adunay giladmon nga 5 kilometros ug hinungdan sa tectonic nga lihok sa yuta.
Gilayon gimandoan ni Presidente Ferdinand “Bongbong” Marcos Jr. ang tanang ahensya sa gobyerno aron makatabang sa mga komunidad nga apektado sa maong katalagman.
SOURCE: GMA NETWORK
