54 ka safe conduct pass ang gipang apod-apod ngadto sa mga aplikante sa amnestiya sa mga kanhi Rebelde atol sa Awarding of Safe Conduct Pass & FR Amnesty Applicants and Press Conference nga gipahigayon didto sa Centennial Stage, Kaamulan Park, Malaybalay City, Bukidnon kagahapon Setyembre 29, 2025.
Ang seremonya gipangulohan sa National Amnesty Commission, nga girekomenda sa Local Amnesty Board sa Cagayan De Oro (LAB CDO), nga gidumala ni RP Merlynn Barola-Uy, Chairperson, uban sa 4th Infantry Division, ug 89IB Philippine Army kauban sa kapolisan.
Si alyas War Wind, kinsa kanhi recruiter sa grupong NPA usa sa nakadawat sa Safe Conduct Pass nga dako ang pasalamat tungod kay sulod sa taas nga katuigan nahatagan kini sa tsansa magkinabuhi nga normal ug malinawn uban ang katilingban.
Samtang gibutyag ni Regional Prosecutor Atty. Barola -Uy atol sa Press Conference nga hangtud karon wala pay bisag usa ang natanyagan ug hingpit nga amnestiya sa kapin 200 ka natagaan sa safe conduct pass tungod kinahanglan kini aprobahan sa Presidente.
Kahibaloang ang maong Safe Conduct Pass usa ka permiso ug prebilihyo sa gobyerno nga gihatag sa mga kanhi rebelde nga nag-apply ug Amnestiya human misurender nga makalakaw bisan asa sulod sa nasud nga dili mabalaka nga dakpon sa kapulisan.
Pinaagi sa hugot nga pakigtambayayong sa national ug local partners, gisiguro sa gobyerno nga ang mga Kanhi Rebelde mahatagan ug tiunay nga higayon sa pagtukod pag-usab sa ilang kinabuhi, pag-integrate pag-usab sa mainstream nga katilingban, ug pagtampo sa malungtarong kalinaw ug kalamboan sa Bukidnon.
