Kasamtangang gi-review sa gobyerno ang taripa sa importasyon sa bugas ug posibleng mosaka kini ngadto sa 35 porsyento human sa kasamtangang import ban
Si Agriculture Secretary Francisco Tiu Laurel Jr, miingon nga gitun-an niya ang maong posibilidad kauban nila Finance Secretary Ralph Recto ug Special Assistant to the President for Investment and Economic Affairs Frederick Go, isip tubag sa direktiba ni Presidente Ferdinand Marcos Jr.
Nagkadaghan ang mga panawagan sa mga grupo sa mag-uuma sama sa Federation of Free Farmers (FFF) ug sa Magsasaka Party List nga ipatuman ang provisional safeguard duties ubos sa Safeguard Measures Act aron maprotektahan ang lokal nga mga mag-uuma gikan sa pagkahugno sa presyo sa bugas nga mius-os ubos sa ₱10 matag kilo tungod sa barato nga imported nga bugas.
Matod ni Raul Montemayor, national manager sa FFF, ang 60 ka adlaw nga import ban dili igo aron mousbaw ang presyo sa bugas tungod kay ang mga magpapatigayon nagpaabot nga mobalik ang barato nga imports diin ang pagkunhod sa taripa gikan sa 35% ngadto sa 15% kaniadtong Hulyo 2024, inubanan sa 40 porsyento nga pag-ubos sa presyo sa bugas sa kalibutan, maoy hinungdan sa pagkaalkanse sa mga mag-uuma.
Kung walay aksyon niini, kapin sa 2.5 milyones ka mag-uuma ang posibleng mawad-an og ₱43 bilyones nga kita karong tuiga
via: DA/BUSINESSWORLD
