Midako ang kadaot nga natala sa sektor sa agrikultura tungod sa mga paghapak sa sunod-sunod nga mga bagyo nga miigo sa nasod.
Base sa datus sa DA-DRRM Operations Center niadtong Lunes, Setyembre 29, mokabat na sa P1.38 bilyones ang kantidad sa kadaot sa agrikultura o katumbas sa 109,997 metric tons sa nawala nga produksiyon.
Kun asa nakaapekto kini sa panginabuhian sa kapin sa 55,000 ka mag-uuma ug mangingisda. Mokabat sa 47,723 ka ektarya ang naapektuhan sa mga kalamidad, diin 89.30% niini adunay kahigayonan nga marekober samtang 11.70% ang walay kahigayonan nga marekober.
Diin natala kini sa Cordillera Administrative Region, Ilocos Region, Cagayan Valley, Central Luzon, CALABARZON, MIMAROPA, Western Visayas, Northern Mindanao, ug SOCCSKSARGEN. Labing naapektohan sa bagyo ang bugas humay, gisundan sa mais, high value crops ug uban pa.
Agig tubag, gimandoan ni Agriculture Secretary Francisco Tiu Laurel Jr. ang tanang rehiyonal nga buhatan sa mga apektadong lugar ingon man ang Philippine Crop Insurance Corp. nga paspasan ang pag verify sa mga danyos ug gibanabana nga naapektuhan aron maapod-apod dayon ang hinabang ngadto sa mga apektadong mag-uuma ug mangingisda.
Samtang, ang Rehiyon sa Ilocos ang nakahiagom sa labing daghan o labing grabe nga kadaot sa mga imprastraktura tungod sa mga epekto sa nangaging mga bagyo.
Matod sa NDRRMC, 77 ka mga imprastraktura ang naguba nga nagkantidad og kapin sa P773 milyones. Gisundan kini sa Rehiyon 2, CAR, CALABARZON, MIMAROPA, Rehiyon 5, Rehiyon 6 ug Rehiyon 7.
Sa kinatibuk-an, niabot na og kapin sa P979 milyones ang natala nga kadaot sa mga imprastraktura sa nasud tungod sa mga bagyo.
Photo Courtesy to:adobe stock
