Nanawagan si Senador Bam Aquino nga siguruhon nga adunay igo nga pondo alang sa kapin 2.27 milyon nga mga estudyante sa mga State Universities and Colleges (SUCs) sa tuig 2026.
Gihangyo niya ang Department of Budget and Management (DBM) ug Commission on Higher Education (CHED) nga magtinabangay aron masiguro nga ang enrollment projections sa mga SUC motugma sa pondo nga giandam alang sa 2026 national budget ug sa mga musunod nga appropriations.
Giluwatan ni Aquino ang maong pamahayag atol sa budget hearing sa SUCs human ipahibalo sa Philippine Association of State Universities and Colleges (PASUC) nga gilauman nga mudugangan pa og 300,000 ang kasamtangang 1.97 milyon nga mga estudyante sa 2026.
Apan, wala nagtugma ang datos sa DBM sa pagbana-bana sa PASUC, nga nagresulta sa P3.29-bilyon pesos nga kakulangon sa pondo. Gipasiugda ni Aquino ang kamahinungdanon sa pag-uyon sa enrollment projections ug ang bugti nga pondo alang sa Free Higher Education sa matag SUC.
Gipahinumdom usab niya nga andam ang Committee on Finance, nga gipangulohan ni Sen. Sherwin Gatchalian, sa paghatagad ug pagtagad sa maong kakulangon.
Gipasalig ni Aquino nga ibalik sa komite ang P12.3-bilyon nga budget deficit ug hatagan ang SUCs og igo nga pondo alang sa capital outlay, maintenance and other operating expenses ug personal services ubos sa 2026 budget.
Photo courtesy of philnews.ph
