Gipangunahan sa grupo nga Ivangers nga nagrepresentar sa Macaraeg-Macapagal House ang gilusad nga Tartanilya Beautification Contest sa Iligan City, ang usa sa mga programa sa Diyandi Festival 2025, kni human nakuha sa grupo nga Ivangers ang una nga ganti nga P25,000, samtang ang kutsero nga si Nemesio Tito Jr. nakadawat usab og P7,000 isip pasidungog.
Nakab-ot sa Ivangers ang kinatas-ang score nga 92.92%, nga nagpamatuod sa ilang artistic nga kahanas, pagka-mahigugmaon sa kultura, ug maayong pagka-disenyo sa ilang tartanilya.
Nakuha usab ang First Runner-Up sa grupo sa Yano nga Iliganon, nga nagrepresentar sa Maze Park and Resort, samtang Second Runner-Up ang Dalipuga Centennial Park nga gihimo sa visual artist nga si New Bee. Gisundan kini sa Former Senator Tomas Cabili Obelisk Rotonda ug sa Limunsudan Falls nga gidisenyo sa Team Ramboo.
Kapin sa 20 ka grupo sa mga visual artists gikan sa Iligan ug kasikbit nga mga lugar ang miapil sa maong tinuig nga kompetisyon nga nagtinguha sa pagpasundayag sa lokal nga talent, pagpasiugda sa kultura ug tradisyon, ug ang pagpalig-on sa mga turistang atraksyon sa syudad
Gipangulohan ang kompetisyon sa Committee Chairperson on Cultural and Heritage, uban sa suporta sa lokal nga kagamhanan.
Ang maong kalihokan kabahin sa inisyatibo sa Iligan City Government nga mapausbaw ang kultura ug turismo pinaagi sa sining ug partisipasyon sa komunidad.
